Davlat aktivlarini boshqarish agentligi direktori ishtirokida barcha viloyatlar tadbirkorlik subyektlari vakillari, investorlar va biznes doira vakillari uchun keng qamrovli ochiq muloqot hamda sayyor qabul bo‘lib o‘tdi. Konstruktiv va shaffof ruhda o‘tgan uchrashuvda respublikamizning barcha hududlaridan kelgan tadbirkorlarning muammolari atroflicha tinglanib, ularga amaliy yechimlar ko‘rsatildi hamda sohaga oid yangi imtiyozlar tushuntirildi.

Mamlakatimizda investitsiya muhitini yaxshilash, tadbirkorlik faoliyatini har tomonlama qo‘llab-quvvatlash hamda davlat aktivlarini xususiylashtirish jarayonlarida ochiqlikni ta’minlash borasida tizimli ishlar amalga oshirilmoqda. Bugun tashkil etilgan keng qamrovli ochiq muloqot ham bevosita joylarda, barcha viloyat va tumanlarda biznes vakillari duch kelayotgan to‘siqlarni bartaraf etish va ularga qulay shart-sharoitlar yaratish maqsadiga qaratildi.

Uchrashuv davomida Agentlik direktori tomonidan respublikamizning turli hududlaridan tashrif buyurgan faol va yangi ish boshlayotgan tadbirkorlarning murojaatlari, taklif va mulohazalari birma-bir tinglandi. Muloqot davomida asosan davlat aktivlarini sotib olish, yer va bino-inshootlarni xususiylashtirish, auksion savdolari bilan bog‘liq hududiy jarayonlar hamda tadbirkorlikni kengaytirishdagi huquqiy-texnik masalalar muhokama markazida bo‘ldi.

Ko‘tarilgan masalalarning aksariyati bo‘yicha joyining o‘zida huquqiy tushuntirishlar berilib, amaliy yechimlar belgilandi. Xususan, barcha viloyatlardan kelgan tadbirkorlar tomonidan o‘rtaga tashlangan har bir muammo va murojaat alohida e'tibor bilan atroflicha o‘rganildi hamda ularga joyida huquqiy-amaliy yechimlar topildi. Shuningdek, tadbirkorlarga qulaylik yaratish maqsadiga qaratilgan qonunchilikka kiritilgan so‘nggi o‘zgartirishlar, bo‘lib-bo‘lib to‘lash imkoniyatlari hamda tadbirkorlik subyektlari uchun berilayotgan yangi imtiyozlar paketi haqida atroflicha ma’lumot berildi. Bu imtiyozlar barcha hududlardagi biznes vakillariga moliyaviy yuklamalarni kamaytirish va faoliyatlarini qisqa muddatda kengaytirish imkonini berishi alohida ta’kidlandi.

Shu bilan birga, yechimi ma’lum vaqt va qo‘shimcha o‘rganishni talab qiladigan, shuningdek, hududiy boshqarmalar va boshqa idoralar bilan hamkorlikda hal etilishi lozim bo‘lgan tizimli murojaatlar qat’iy nazoratga olindi. Agentlik rahbariyati tomonidan barcha hududiy boshqarmalar boshliqlari va tegishli mas’ul shaxslarga har bir murojaatni qonuniy doirada, qisqa muddatlarda ko‘rib chiqish va tadbirkorlarga ko‘maklashish bo‘yicha aniq topshiriq va ko‘rsatmalar berildi.

Davlat aktivlarini boshqarish agentligi barcha viloyatlardagi tadbirkorlar va investorlar bilan to‘g‘ridan-to‘g‘ri, shaffof va samarali muloqot tizimini bundan keyin ham izchil davom ettiradi.